आणीबाणीच्या प्रसंगीही म्युच्युअल फंड उपयुक्त

कुटुंबाचे आर्थिक नियोजन करताना आपत्कालीन निधीचाही विचार करावा लागतो.

कुटुंबाचे आर्थिक नियोजन करताना आपत्कालीन निधीचाही विचार करावा लागतो. गुंतवणूकदारांनी तीन ते सहा महिन्यांचा सरासरी मासिक खर्च हा आपत्कालीन निधी म्हणून राखीव ठेवावा, असा सल्ला अर्थनियोजक नेहमी देतात. विशेष म्हणजे, हा निधी म्युच्युअल फंडाच्या माध्यमातून उभारणे शक्य आहे. l आपत्कालीन निधी उभारण्याची गरज काय? अनेक प्रसंगी तातडीच्या आर्थिक मदतीची गरज भासू शकते. नोकरी गमावणे, गंभीर आजारपण, मोठे वैद्यकीय खर्च, अचानक उद्भवलेला लांबचा प्रवास आदी कारणांसाठी आर्थिक तरतूद करावी लागते. नेहमीच्या बचतीवर ताण पडू नये म्हणून असे खर्च भागविण्यासाठी राखीव ठेवण्यात येणारी रक्कम म्हणजे आपत्कालीन निधी. असा निधी नेहमी उपलब्ध ठेवावा, असा सल्ला अर्थनियोजक देतात. l आपत्कालीन निधी कशाप्रकारे उपयुक्त ठरतो? आणीबाणीच्या प्रसंगी मोठा खर्च उद्भवल्यास आपण सहसा नातेवाईक अथवा मित्रमैत्रिणींकडून पैसे घेतो. मुदत ठेवी मोडून अथवा शेअर्स विकून पैसे उभारण्याचाही पर्याय असतो. मात्र योग्य नियोजन करून आपत्कालीन निधीची उभारणी केल्यास हे सर्व टाळता येते. या निधीमुळे तुम्ही नेहमी निश्चिंत राहू शकता.

शिवाय, अनावश्यक खर्च टाळणे व बचतीची सवय लागणे हेदेखील याचे फायदे आहेत. l हा निधी किती असावा? आपत्कालीन निधीचे प्रमाण हे तुमच्या जीवनशैलीवर अवलंबून असते. मासिक प्राप्ति व खर्चाच्या प्रमाणात हा निधी ठरतो. तुमच्या सरासरी मासिक खर्चाच्या तीन ते सहापट म्हणजे तीन ते सहा महिन्यांचा खर्च आपत्कालीन निधी म्हणून राखीव ठेवणे योग्य ठरते. हा निधी उभारण्यासाठी डेट म्युच्युअल फंड हा सर्वोत्तम पर्याय आहे. सिस्टीमॅटिक इन्व्हेस्टमेंट प्लॅन अथवा फंडात एकरकमी गुंतवणूक (लिक्विड फंड किंवा अल्पमुदतीचा फंड) करून हा निधी उभारता येतो. या फंडमध्ये तरलता अधिक असल्याने आणीबाणीच्या प्रसंगी यातून निधी उभारता येतो.

कामकाजाच्या एक ते दोन दिवसांत हे पैसे मिळू शकतात. l या निधीतून किती परतावा मिळू शकतो? बँकेच्या बचत खात्यात पैसे पडून राहिल्यास केवळ साडेतीन टक्के व्याजाचा परतावा मिळतो. मात्र आपत्कालीन निधी ज्या माध्यमातून उभारला जातो त्या लिक्विड किंवा अल्पमुदतीच्या फंडांतून निश्चितच अधिक म्हणजे पाच ते सात टक्क्यांपर्यंत परतावा मिळतो. या फंडांची गेल्या वर्षातील कामगिरी पाहिल्यास लिक्विड फंडांनी ६.६१ तर, अल्पमुदतीच्या फंडांनी ६.८९ टक्के परतावा दिल्याचे दिसेल.

सौजन्य महाराष्ट्र टाइम्स